Sugbo napukan’
Sun Star Cebu Super Balita September 16, 2004
NAKASEGURO na’g puwesto sa division finals ang Laguna Springs human nila gibuntog ang Tribu Sugbo, 76-75, pinaagi sa overtime sa niaging gabii sa National Basketball Conference (NBC) sa gikagubtang RECS Complex sa Sta. Cruz, Laguna.
Ang Springs nikatkat og samot sa ibabawng bahin sa North division bitbit ang 8-5 nga baraha ug kon bisan unsa pay mahitabo sa nangahabilin pang mga duwa sa eliminasiyon, di na gyud sila sa maapsan.
Sa patakaran, ang mopatigbabaw sa matag North ug South mao ang makaderetso sa division finals unya ang mahabilin moagi pa’g laing ang-ang.
Human sa eliminasiyon, ang no.4 team sa matag division makigbatok sa twice-to-beat nga no.3 team.
Ang modaog ning sangkaa makig-harong sa naghuwat nga no.2 team alang sa best-of-three series sa division semi-finals.
Unya ang mopatigbabaw na niining duwaa mao ang makigbatok sa no.1 team alang sa division finals, nga kombatihan sab pinaagi sa best-of-three format.
Ang division champions mao ang mag-engkuwentro sa National best-of-five finals series.
Di hinuon kaayo tantong sakit alang sa Tribes ni coach Al Solis ang kapildihan gumikan kay segurado na man sila’g puwesto sa South finals pinaagi sa ilang 10-3 nga baraha.
Ang nakaapan lang kay naangol og balik ang walang tuhod ni Jojo Tangkay sa 1st quarter pa lang sa duwa ug wa na kini makabalik.
Apan bisa’g wa si Tangkay ug Ardy Larong, kinsa sulod na sa duha ka mga duwa nga wa makatunga gumikan sa kamatayon sa iyang amahan ning bag-ohay lang, ang Tribes nakakombate gihapon og insakto.
Apan alang ni Laguna playing coach Mike Buendia, gitumbok niya nga ang teamwork gyud maoy nagtuboy kanila sa kadaugan.
“This team has finally gotten together and played as one unit,” batbat ni Buendia. “Chris (Corbin) played his breakout game, and the other guys simply wanted to win and gave their share.”
Karong gabii, ang Tribes moatake sa Batangas 29ers sa pagpadayon sa torneyo nga suportado sa Panasonic, Spring Cooking-Oil, Philippine Charity Sweepstakes Office, Sulpicio Lines, Nature’s Spring Mineral Water, Cebu Ferries, Air Philippines, Supercat, Skygo Motorcycles, Trans-Asia, Accel ug Molten.
Puntos matag usa:
Laguna 76 - Corbin 18, Capobres 16, Serrano 8, Garcia 8, Manuel 6, Reyes 6, Nicdao 6, Kalaw 4, Mendoza 2, Caceres 2, Epondulan 0.
Cebu 75 – Piodo 17, Dela Rosa 10, Concha 8, Almacin 8, Grijaldo 8, Elim 6, Sanders 6, Galinato 4, Lanete 4, Bucao 2, Mercado 2, Tangkay 0.